PODEMO DECÌDARE… SE LO VOLEMO.

(Guarda la Versione in Italiano se vuoi)

“L’unità e la indivisibilità della Repubblica resta valore storico e principio fondamentale, di certo non negoziabile”: sto qua el xe stà el mesajo lancià dal presidente de la republica italiana el 18 de setenbre. Parole dite a Venesia, die “sità dei Veneti”, par secoli capitale de la Republica pì longa e prospera al mondo.
Parole dite rento a Palàso Ducale, posto sìnbolo de la Storia del Popolo Veneto, centro de quela siviltà storico-politica che par pì de 1.100 àni gà visto el nostro Popolo protagonista ativo de la so vita e del so destìn.
Quel Popolo, el nostro, par pì de 1.100 àni el gà savudo insegnar al mondo principi e valori VERI de libartà, de democrasia, de rispeto VERO de la Republica verso i so’ citadini e de i citadini verso la só Patria Veneta.
Sóto quelo che xe pasà a la Storia come el “bon governo Veneto” par nialtri ghe xe stà on svilupo sociale unico, da la ministrasión politica a quela economica, da la justìsia al canpo de le arti.
Avendo ben ciaro davanti quanto ghemo visudo e costruìo, nialtri Veneti, par secoli e secoli, no podemo che provar on senso de tristésa profonda davanti a la socetà indove, dopo solo 140 àni, semo costreti a vìvare: on mondo dejenerà, coroto, furbesco e mafioxo, inte na parola “italianixà”.No volemo gnanca tirare in balo el fato che le tère Venete e i Veneti i xe stà tirà rento al stato italian co quelo che Montanelli el gà definìo on “plebiscito burletta” (quelo che tanti stòrici i ciama sensa problemi “plebiscito truffa” die 1866), come no volemo in sto momento ritornar co la memoria a quando vivévimo inte on Stato veramente Lìbaro e rispetoxo dei só citadini, amirà da tuto el mondo.
El nostro el xe on sigo de dolore atuale par quelo che i ne ga fato deventàr: na colonia de on stato che no ne considera se non come fòrsa lavoro, xente sfrutà a cui no ghe vien dà gnanca la posibilità de inparare la só storia e la só lengoa a scola. Xente tratà da rasisti e egoisti, atejamenti che psicolojicamente crea continui sensi de colpa fra la nostra xente, on Popolo che invése xe primo pa solidarietà, par volontarià, pa donasión dei organi e del sàngoe, pa riciclo de le scoàse… tute robe che no i gà intarèse a dirne.
Ieri a Palàso Ducale chi che stà a capo del stato italiàn el xe vegnù a parlare de “unità de l’Italia”, de costitusion, rivando a dir «No all’egoismo delle regioni ricche»….. Egoismo…. Pretèndare che le nostre risorse no le vegna magnà da on stato coróto a tuti i liveli come da quando che xe nata l’Italia sucede, xelo forse egoismo? Pretèndare che el fruto dei nostri sacrifici el vegna reinvestìo intel nostro teritorio xelo egoismo? Pretèndare che inte le scole del Veneto se ghe insegni ai nostri fioi anca la NOSTRA storia Veneta, la NOSTRA cultura e le NOSTRE tradisión, ndando quindi contro la censura italiana che vieta de fàto che i Veneti i conosa ste robe, xelo egoismo questo?
Ghemo davanti dó posibilità: star a vardare, continuando a tegner la testa bàsa sóto i continui sensi de colpa finti, che ne vien trasmési ogni dì, sprofondando come economia e valori sociali tirà bàso da on stato che ne sfruta da 140 àni, opur vardàr a l’exenpio poxitivo e senpre vivo, nonostante la censura de la “cultura ufficiale di stato”, che xe stà la Repùblica Veneta, exenpio de progrèso e svilupo.
La Storia, quando la ghemo fata nialtri, da protagonisti, ne ga visti vìnsare contro tuto e contro tuti. No stemo rasegnarse in sto momento tristo, no stemo lasàrse vìnsare, ghemo el dirito sacrosanto de poder decìdare pal nostro Futuro e ghemo xà dimostrà quanto che podemo fare.
Sta solo a nialtri decìdarlo, se ne va ben star cusì o se volemo canbiare.
Ancora par poco, ma semo ncora in tenpo pa canbiar! E questo no xe egoismo, Präsident, ma tornàr de novo protagonisti de la nostra vita! Da Veneti.

Asociasión Veneto Nostro – Raixe Venete
www.raixevenete.net
19/09/2008